Parkódín Forte til á næsta ári

Gætt hefur skorts á algengum lyfjum í apótekum víða, hvort heldur er á höfuðborgarsvæðinu eða á landsbyggðinni. Þetta á jafnt við um lyf sem seld eru í lausasölu og lyfseðilsskyld lyf.

Á biðlistum hjá dreifingarfyrirtækjunum Distica og Parlogis eru nú samtals 127 lyf. Á meðal þeirra eru algeng verkjalyf á borð við Íbúprófen Portpharma og Voltaren. Flest lyfjanna eru væntanleg síðar á árinu. Parkódín Forte, sem hefur ekki verið til í tíu daga, er væntanlegt í febrúar.

Lyfjafræðingar sem Fréttablaðið hefur rætt við segja skortinn óheppilegan þótt vandamál hafi ekki komið upp. Ávísað hafi verið á sambærileg lyf, svo sem Panódíl þegar Paratabs vantaði fyrir nokkru. Tryggingastofnun hefur tekið þátt í tímabundnum aukakostnaði af þessum sökum.

Fríður Skeggjadóttir, lyfjafræðingur hjá Lyfjum og heilsu á Akureyri, segir alltaf eitthvað um að algeng lyf vanti. Fyrir því geti verið margar ástæður; hráefnisskortur hjá framleiðanda, vandamál tengd merkingum og annað í þeim dúr. „Yfirleitt er hægt að fá lyfið í öðrum styrkleika, annað lyfjaform þess eða samheitalyf,“ segir hún.- jab