Reykjavíkurborg skapar á sjötta hundrað ársverk

Fjárfestingar- og framkvæmdaáætlun Reykjavíkurborgar næsta árs gerir ráð fyrir að 6,5 milljörðum króna verði varið til fjárfestinga. Það er umtalsverð aukning frá því sem gert var ráð fyrir í gildandi þriggja ára áætlun, en svipuð fjárhæð og á þessu ári.

Með þessum áherslubreytingum er stuðlað að framkvæmdum og auknu atvinnuframboði. Framkvæmda- og eignasvið áætlar að á bilinu 530 til 580 bein ársverk geti verið að ræða, að því er kemur fram í tilkynningu frá Reykjavíkurborg.  Þá er ótalin afleidd störf.



Helmingurinn í endurbætur og viðhald

Rúmur helmingur áætlunarinnar, tæpir 3,3 milljarðar,  eru vegna endurbóta og meiriháttar viðhaldsverka og er það í samræmi við áherslur borgarráðs sem fól Framkvæmda- og eignasviði að kanna með hvaða hætti hægt væri að flýta þeim þáttum til að efla atvinnu í borginni.  

Að mati Framkvæmda- og eignasviðs má líta svo á að  til lengri tíma litið valdi þessar framkvæmdir ekki auknum kostnaði borgarsjóðs þar sem hvort sem er hefði þurft að ráðast í þær innan ekki langs tíma.

Stærsta einstaka verkefnið af þessum toga er fyrsti áfangi við endurgerð sundlaugarmannvirkja. Í það verður varið hálfum milljarði.



Nýtt torg við Hörpuna

Sundlaugar, torg og annað sem forsvarsmenn borgarinnar meta að geti haft skapandi áhrif á umhverfið eru áhersluatriði á verkefnalistanum. Meðal annars verða undirbúnar endurbætur Lækjartorgs, Ingólfstorg og nýs torgs við Tónlistar- og ráðstefnuhúsið, Hörpuna.

Sömu sögu er að segja af torgum, opnum svæðum og leiksvæðum í hverfum borgarinnnar. Samráð við íbúa í hverfunum um val framkvæmda og útfærslu þeirra verður aukið.

Tveir skólar kláraðir

Þá verður byggingaframkvæmdum við tvo stóra skóla lokið á árinu, en það eru Norðlingaskóli og Sæmundarskóli.

Verkefnum er forgangsraðað í ljósi áhrifa þeirra á störf, að því er segir í tilkynningu.  Framkvæmdir sem krefjast margra vinnufúsra handa verða forgangi og áhersla verður lögð á að nota íslenska framleiðslu og efnivið.  

Sérstaklega var horft  til framkvæmda sem skapa afleidd störf að framkvæmdum loknum og hljóta þau sérstakan forgang.

Næst var horft til þeirra framkvæmda sem líklegast er að leiði af sér auknar tekjur í framtíðinni á móti þeirri hækkun kostaðar sem til kemur vegna fjárfestinganna.  

Í þriðja flokk eru svo settar þær framkvæmdir sem leiða af sér aukinn rekstrarkostað og skapa fyrst og fremst störf meðan á framkvæmdum stendur.

Samráð við íbúa

Í ríkari mæli en áður verður við undirbúning framkvæmda, sérstaklega í almenningsrýmum, haft samráð við hverfaráð og íbúa um forgangsröðun verkefna og útfærslur.

Þannig eru 150 milljónir áætlaðar í svokallaða ,,hverfapotta" til framkvæmda innan hverfanna. Er þeim einkum ætlað að virkja íbúa í hverfum og með þeim á að bæta ástand opinna svæða og torga í hverfum borgarinnar. Þá verður einnig gert átak í miðborginni til fegrunar en stefnt er að því að framkvæmdirnar dragi fleira fólk til miðborgarinnar og ánægjulegra verði fyrir fjölskyldu- og ferðafólk að dveljast þar.   

Með fyrirvara um lánsfé

Gert er ráð fyrir að fjárfestingar verði að mestu leiti fjármagnaðar með lánum. Líkt og íðustu tvö ár er fjárfestingaráætlunin sett fram með fyrirvara um að lánsfé fáist á ásættanlegum kjörum. Áfram er stefnt að samvinnu við Vinnumálastofnun um átaksverkefni.