42 látnir og fjölmargir slasaðir eftir bruna í Kína

Að minnsta kosti 42 eru látnir og yfir 90 eru slasaðir eftir að eldur kom upp í 28 hæða háhýsi í Sjanghæ í Kína í dag. Margir íbúar þurftu að flýja út á vinnupalla sem eru við húsið.

Mikinn reyk lagði yfir borgina og sást reykjamökkurinn úr marga kílómetra fjarlægð. Um sex klukkutíma tók að slökkva eldinn.

Sjónarvottar segja að kviknað hafi í einhverskonar byggingarefni sem fast var við húsið en verið var að gera húsið upp. Þrátt fyrir það hefur slökkvilið ekki staðfest hvað það var sem olli brunanum.