Davíð Þór slapp við alvarleg meiðsli

Svo virðist sem að Fylkismaðurinn Davíð Þór Ásbjörnsson hafi sloppið við alvarleg höfuðmeiðsli en hann var fluttur á sjúkrahús í gær.

Davíð Þór fékk þungt höfuðhögg í leik Fylkis og Hauka í gær og að sögn Ólafs Þórðarsonar, þjálfara Fylkis, virðist hann hafa sloppið nokkuð vel.

„Hann er kominn heim til sín og þarf að hvíla sig í nokkra daga," sagði Ólafur í samtali við Vísi. „Svo ætti þetta að verða í lagi. En maður veit auðvitað aldrei með höfuðmeiðsli - það verður bara að vona það besta."

„En þetta leit alls ekki vel út. Hann klemmdist illa á milli leikmannanna," bætti hann við.