Dæmdur nauðgari einn þeirra sem var handtekinn í kókaínmáli

Átta manns, sjö karlar og ein kona, hafa verið úrskurðuð í gæsluvarðhald til vikuloka.

Þau eru grunuð um stórfelldan fíkniefnainnflutning. Europol rannsakar málið í samvinnu við lögregluna hér á landi. Einn hinna handteknu er Davíð Garðarsson, dæmdur nauðgari sem var á flótta undan lögreglunni í tæp tvö ár.

Þar síðustu helgi handtók lögreglan fimm menn á höfuðborgasvæðinu eftir að par hafði verið stöðvað á Keflavíkurflugvelli af tollvörðum með fíkniefni í ferðatöskum.

Fólkið er grunað um að hafa flutt kókaín til landsins frá Spáni.

Einn karl til viðbótar var handtekinn síðastliðinn fimmtudag en sá var úrskurðaður í gæsluvarðhald til 30. apríl.

Flest hefur fólkið áður komið við sögu lögreglu, mismikið þó. Hinir grunuðu eru allir íslenskir og á þrítugs- til sextugsaldri.

Rannsókn málsins er nokkuð umfangsmikil en það snýst í raun um tvær tilraunir til innflutnings á kókaíni.

Í öðru tilvikinu var afhendingu fíkniefnanna fylgt eftir, það er að segja frá því meint burðardýr kom því í hendur viðtakenda.

Europol hefur komið að rannsókninni þar sem miða er að því að tengja málin við önnur sem upp hafa komið, bæði hérlendis og erlendis, þar sem Íslendingar hafa komið við sögu.

Rannsóknin víðtæk en í tengslum við hana hefur lögreglan gert fjölda húsleita.

Í þeim hefur verið lagt hald á umtalsverða fjármuni sem og skartgripi.