Carlsberg boða uppsagnir eftir verkfall

Carlsberg bjórverksmiðjurnar boða uppsagnir starfsfólks þegar það loks kemur til vinnu aftur eftir verkfall sem hófst í síðustu viku.

Verkfallið nær til 1100 starfsmanna í Danmörku. Það hefur meðal annars leitt til þess að þurft hefur að flytja bjórframleiðslu fyrir markaði í Kanada, Noregi og Svíþjóð til verksmiðja í öðrum löndum.

Talsmaður Carlsberg talar enga tæpitungu. Jens Bekke segir í viðtali við Jyllandsposten að það sé 100 prósent víst að fólki verði sagt upp.

-Við höfum tapað bæði framleiðslu og markaðshlutdeild og það þarf því færra fólk í verksmiðjuna.

Carlsberg bjór er að klárast á Jótlandi og Fjóni og það sama gerist brátt í Kaupmannahöfn og á Sjálandi.

Verkfallið er vegna launadeilna. Jens Bekke segir að framleiðsla á bjór sé þegar dýrari í Danmörku en annarsstaðar.

-Og það verður náttúrlega ennþá dýrara ef fólkið heldur að sami mannskapur eigi að vinna við að framleiða minna. Það gengur ekki upp.