Ráðherrar reknir fyrir bruðl

Tveir franskir ráðherrar hafa sagt af sér eftir að hafa orðið uppvísir að því að bruðla með opinbert fé.

Annar ráðherrann eyddi átján milljónum króna í einkaþotu til þess að flytja sig á fund á eyju í Karabiska hafinu.

Hinn eyddi tæpum tveim milljónum króna í vindla.

Nicolas Sarkozy forseti og Francois Fillon forsætisráðherra komust að þeirri niðurstöðu að ráðherrarnir yrðu að fara.

Talsmaður þeirra sagði við fréttamenn að þeir hefðu ákveðið að taka á þessu máli þar sem franska þjóðin hvorki skildi né gæti sætt sig við framferði ráðherranna.