Borgarfulltrúar koma Sigrúnu Elsu til varnar

Borgarfulltrúar Samfylkingarinnar telja að umfjöllun fjölmiðla um ferðakostnað Sigrúnar Elsu Smáradóttur, borgarfulltrúa flokksins, í janúar hafi verið ósanngjörn og tekinn úr öllu samhengi. Þetta kemur fram í yfirlýsingu frá borgarfulltrúunum.

Þar kemur fram að ferðakostnaður kjörinna fulltrúa í borgarstjórn og fyrirtækjum borgarinnar hafi verið til umræðu borgarstjórnar í vikunni. Ferðalög geti verið nauðsynlegur þáttur í starfi borgarfulltrúa og fulltrúa borgarinnar í stjórnum fyrirtækja.

„Í janúar var mikið gert úr ferðakostnaði Sigrúnar Elsu Smáradóttur borgarfulltrúa Samfylkingarinnar í fjölmiðlum vegna ferðar sem hún fór á vegum REI í kjölfar þess að hún tók þar sæti sem fyrsti og eini fulltrúi minnihlutans. Nú hefur samantekt ferðalaga kjörinna fulltrúa síðastliðin 3 ár leitt í ljós að ferðakostnaður Sigrúnar Elsu sker sig á engan hátt úr ef miðað er við ferðakostnað annarra borgarfulltrúa en hann er afar breytilegur eftir einstaklingum, starfsviðum og tilefnum. Áðurnefnda umfjöllun um ferðakostnað Sigrúnar Elsu verður þvi að telja ósanngjarna og úr öllu samhengi við tilefnið," segir í yfirlýsingunni.

Auk Sigrúnar Elsu sitja Dagur B. Eggertsson, Oddný Sturludóttir og Björk Vilhelmsdóttir í borgarstjórn fyrir Samfylkinguna.