Steinþór: Góðar líkur á að ég semji við Örgryte

Steinþór Freyr Þorsteinsson segir að góðar líkur séu á því að hann gangi í raðir Örgryte í Svíþjóð í dag. Sænska félagið vinnur hörðum höndum að því að klára viðræður við Stjörnuna en þau ræða nú um kaupverð á kappanum.

Steinþór sagði við Vísi rétt í þessu að hann vissi nokkurn veginn hvernig samning Örgryte gæti boðin honum en að hann hefði rætt við það, gert móttilboð og allt væri í réttum farvegi.

Steinþór gæti því klárað sín mál fyrir lokun félagaskiptagluggans en hann sagði við Vísi að málið myndi skýrast í kvöld.

Steinþór er lykilmaður í liði Stjörnunnar og hefur leikið mjög vel í sumar.

Þá á Stjarnan í viðræðum við Garðar Jóhannsson en forráðamenn Stjörnunnar staðfestu þetta við fréttastofu í morgun. Þeir sögðu óvíst hvort næðist að ganga frá málinu fyrir lok félagaskiptagluggans.