Forstjóri stakk hund nágrannans til bana

Breski forstjórinn Mark Deeley, sem er 49 ára gamall, hefur verið ákærður fyrir að drepa hund nágrannans með hnífi. Málið hefur vakið talsverða athygli í Englandi en forstjórinn býr í glæsivillu í rólegu og rótgrónu hverfi. Húsið eitt kostar eina milljón punda sem gera um 180 milljónir íslenskar krónur.

Forstjórinn mun hafa verið úti að viðra eigin hund í nærliggjandi almenningsgarði þegar hundurinn Max á að hafa ráðist á hund Deeleys. Af einhverjum ástæðum var forstjórinn með eldhúshníf í vasanum. Hann stakk Max sem drapst þá samstundis.

Nágrannar segjast felmtri slegnir yfir fregninni. Þannig segir einn nágranninn að margir í hverfinu eigi gæludýr og því sé þeir uggandi að heyra af meintu framferði forstjórans.

Mark Deeley neitar sakargiftum en málinu var frestað fram yfir jól.