Veittust að veitingamanni og hótuðu honum lífláti

Davíð Steingrímsson veitingamaður sem áður var kenndur við Vegas á Laugavegi lenti í því í morgun að tveir menn veittust að honum og hótuðu honum lífláti. Vegas hefur nú verið lokað í kjölfar banns við nektarsýningum og er Davíð nú í óðaönn við að standsetja nýjan stað í sama húsnæði sem á að heita"Ob-La-Di, Ob-La-Da" en á staðnum verður bítlatónlist í fyrirrúmi.

Í morgun beið Davíð eftir iðnaðarmanni við inngang staðarins þegar tveir menn af erlendu bergi brotnir gengu að honum og vildu komast inn á staðinn. „Þeir vildu komast inn á staðinn en ég sagði þeim að það væri lokað," segir Davíð. „Þeir æstu sig strax mjög mikið og héldu því fram að þeir hefðu gleymt einhverri tösku hér í gær. Ég reyndi að segja þeim að það hlyti að hafa verið einhversstaðar annarsstaðar en þeir létu sér ekki segjast og reyndu að ryðjast framhjá mér."

Davíð segist hafa náð að loka hurðinni og læsa og fóru þeir þá að sparka í hurðina og láta öllum illum látum en að sögn Davíðs voru þeir báðir ölvaðir. „Ég fór um staðinn og leitaði að þessari tösku en fann hana auðvitað ekki. Á meðan heyrði ég öskrin í þeim fyrir utan og hótuðu þeir meðal annars að drepa mig. Þá ákvað ég að hringja á lögregluna."

Davíð fór síðan aftur út og reyndi að útskýra fyrir mönnunum að taskan væri ekki á staðnum. „Það hafði ekkert að segja, þeir byrjuðu að ögra mér, ýta við mér og hóta því að ég yrði tekinn af lífi á bjagaðri ensku." Á meðan á þessu gekk hafði nokkur hópur fólks staldrað við og fylgst með uppákomunni. „Þeir sögðust aftur og aftur ætla að koma síðar og drepa mig."

Lögreglan kom á staðinn stuttu seinna og handtók mennina. „Lögreglumennirnir sögðu mér að þeir hafi þurft að hafa afskipti af þeim fyrr í morgun og þá spyr maður sig af hverju þeir eru ekki teknir úr umferð. Ætli það sé ekki búið að sleppa þeim aftur," segir Davíð að lokum.