Ekkert áfall fyrir England að missa Beckham

Ensku dagblöðin eru þakin fréttum af David Beckham og meiðslum hans sem gera það að verkum að hann getur ekki tekið þátt í HM í sumar. Ekki eru allir sem gráta þær fréttir.

Rob Smyth, blaðamaður Guardian, skrifaði pistil í dag þar sem hann segir það alls ekkert áfall að Beckham missi af HM. Í raun geri enskir fjölmiðlar alltof mikið úr málinu.

„Enginn annar maður myndi fá eins mikla samúð og David Beckham fær. Frá fótboltalegu sjónarhorni eru meiðsli hans svipað mikið áfall fyrir HM-vonir Englands eins og ef Matthew Upson eða Michael Carrick myndu meiðast," skrifar Smyth.

„Sú rómantíska tilhugsun að Beckham myndi leiða England til sigurs á HM var aldrei að fara að rætast. Hann hefði ekki byrjað einn einasta leik," skrifar Smyth sem hefur mun meiri áhyggjur af því að Aaron Lennon verði ekki tilbúinn í slaginn fyrir mótið stóra í sumar.