Jón Daði til reynslu hjá AGF

Selfyssingurinn efnilegi, Jón Daði Böðvarsson, mun halda til Danmerkur um helgina þar sem hann verður til reynslu hjá AGF í Árósum.

Þetta kom fram á vef Selfoss en Jón Daði mun dvelja hjá liðinu í eina viku. Einn Íslendingur er fyrir hjá AGF en það er Fjölnismaðurinn Aron Jóhannsson sem var keyptur nú í sumar.

Fjölmargir Íslendingar hafa verið á mála hjá AGF í gegnum tíðina, nú síðast Guðlaugur Victor Pálsson sem var keyptur frá félaginu til Liverpool í fyrra.

Jón Daði lék 21 leik með Selfossi í Pepsi-deild karla í sumar og skoraði í þeim þrjú mörk. Hann er átján ára gamall en á engu að síður 41 leik í deild og bikar með Selfossi á ferlinum.