Eignamenn sem vissu af hruninu munu ekki sleppa

Eignamenn, sem höfðu pata af hruninu og færðu eigur sínar yfir á fjölskyldumeðlimi fyrir örlagadaginn 6. október í hittiðfyrra, munu ekki sleppa ef nýtt frumvarp nær fram að ganga.

Fjölmargir eignamenn færðu eignir sínar yfir á eiginkonur og aðra fjölskyldumeðlimi eftir bankahrunið. Með því reyndu þeir að tryggja að lánadrottnar gætu ekki gengið að eigum þeirra.

Samkvæmt núgildandi lögum eru slíkir gjörningar riftanlegir í allt að tvö ár en frumvarp Helga Hjörvars gerir ráð fyrir því að þessi frestur verði lengdur um tvö ár og verði því í heild fjögur. Um ár er síðan frumvarpið var fyrst lagt fram en í því er gert ráð fyrir að miðað verði við daginn sem allt hrundi, eða 6. október 2008.

„Síðan hafa komið ákveðnar fréttir sem að benda til þess að einhverjir hafi haft pata af hruninu og hugsanlega gripið til ráðstafana fyrir 6. október. Þess vegna beindum við því til nefndarinnar þegar mælt var fyrir málinu í þinginu að kanna hvort að ekki væri ástæða til að láta það gilda strax frá ársbyrjun 2008 til þess að það nægði þá líka til þess sem var að gerast í aðdraganda hrunsins," segir Helgi Hjörvar, formaður efnahags- og skattanefndar Alþingis.