Eiður: Vissum að það yrði erfitt að verjast svona góðu sóknarliði

Eiður Aron Sigurbjörnsson átti ágætan leik í liði ÍBV gegn Blikum í dag. Leiknum lauk með 1-1 jafntefli þar sem Eyjamenn jöfnuðu eftir að Kópavogsliðið komst yfir.

„Ég er sáttur með þetta. Blikarnir með hörku lið og við vissum að það yrði erfitt að verjast á móti svona góðu sóknarliði. En mér fannst við alveg standast þá og vorum ekki að gefa mikil færi á okkur," sagði Eiður.

„Mér fannst við standa vel í vörninni og það er ótrúlega þægilegt að spila hliðina á Rasmus Christiansen, hann er mjög góður. Svo er James Hurst líka alveg frábær, yfirvegaðasti maður á bolta sem ég hef nokkurntíman spilað með, það virkar stundum bara eins og hann nennir þessu ekki, alveg óhræddur við að snúa á menn í okkar teig."

Þú virtist fá högg á öklann undir lok leiksins, er þetta eitthvað alvarlegt?

„Ég veit það ekki, ég fór niður í skallabolta og heyrði bara smell í ökklanum og er bara alveg að drepast í honum núna. Vonum bara að þetta sé ekkert alvarlegt."