Heimir: Kannski er þetta ár landsbyggðarinnar

Heimir Hallgrímsson, þjálfari ÍBV, hefur ekki velt sér mikið upp úr öðrum leikjum en sínum í lokaumferð Pepsi-deildar karla sem fer fram á morgun.

„Það er ekkert annað hægt að gera en að standa skil á okkar og vona það besta," sagði Heimir en ÍBV er í öðru sæti deildarinnar, einu stigi á eftir Breiðabliki.

Eyjamenn þurfa því að treysta á hagstæð úrslit í leik Breiðabliks og Stjörnunnar á morgun en sjálfir mæta þeir Keflvíkingum á útivelli.

„Ég hef ekki verið mikið að spá í okkar möguleikum í titilbaráttunni. Auðvitað vonar maður að þetta fari á besta veg. Ég held að við séum að spila við erfiðasta andstæðinginn af þessum þremur liðum sem eru í þessari baráttu. Þar að auki er veðurspáin ekki góð," sagði Heimir en þriðja liðið, FH, mætir Fram á útivelli.

Heimir segist þrátt fyrir allt vera nokkuð afslappaður. „Ég held að þetta verði enginn sirkusleikur hjá okkur. Við förum í þennan leik eins og allra aðra."

„En tilfinningin er góð eins og fyrir alla leik. Við höfum undirbúið okkur vel. Það sem gæti helst sveiflast með okkur er að liðum af landsbyggðinni hefur gengið vel í sumar. Liðin sem fóru upp í 2. deildinni (Víkingur, Ólafsvík og BÍ/Bolungarvík) og 3. deildinni (Tindastóll og Dalvík/Reynir) eru öll af landsbyggðinni og þá komst einnig Þór upp í Pepsi-deildina. Svo er spurning hvað gerist á morgun."

„Kannski er þetta ár landsbyggðarinnar."