Heimir: Umræðan hefur verið hættuleg fyrir okkur

FH er eitt af þeim þremur liðum sem á möguleika á Íslandsmeistaratitlinum þegar lokaumferð Pepsi-deildar karla fer fram á morgun.

FH stendur þó verst af þessum þremur liðum. Breiðablik er í efsta sæti deildarinnar með 43 stig, ÍBV er með 42 og FH með 41.

„Það eina sem við getum gert er að hugsa um okkar leik og reyna að vinna hann. Við myndum aldrei fyrirgefa okkur ef við myndum klúðra okkar málum og ef eitthvað gerðist í hinum leikjunum," sagði Heimir Guðjónsson, þjálfari FH, en liðið mætir Fram á útivelli á morgun. „Við þurfum því að standa klárir á okkar leik."

Hann segir að umræðan sem hefur verið fyrir lokaumferðina sé hættuleg fyrir hans lið.

„Það eru allir að tala um að FH muni klára sinn leik. Meðal annars vegna þess að þrír leikmenn hjá Fram eru í banni og tveir meiddir. Ég met stöðuna hins vegar þannig að það muni ekki hjálpa okkur neitt. Fram mun stilla upp ungum og efnilegum leikmönnum sem vilja sýna sig og sanna í leiknum. Það er nóg af þeim í Fram."

Af þessum þremur liðum sem keppa um titilinn á morgun býr þó FH óneitanlega yfir mestu reynslunni enda hefur liðið orðið fimm sinnum meistari á síðustu sex árum og vann auk þess bikarmeistaratitilinn í sumar.

„Það gæti eflaust hjálpað okkur en um leið og við förum að leyfa okkur að hugsa á þessum nótum þá lendum við í vandræðum. Við þurfum að mæta 100 prósent einbeittir og klára okkar leik. Ef við hugsum um eitthvað annað þá lendum við í vandræðum."