Umfjöllun: Blikar vel að titlinum komnir

Breiðablik varð í dag Íslandsmeistari karla í knattspyrnu eftir að liðið gerði markalaust jafntefli við Stjörnuna í Garðabænum í dag.

Þökk sé tapi Eyjamanna í Keflavík á sama tíma dugði Blikum jafnteflið. Þeir hlutu 44 stig, jafn mörg og FH sem vann Fram í dag en með betra markahlutfall. ÍBV varð svo í þriðja sæti með 42 stig.

Fyrri hálfleikur í dag var mjög fjörugur. Heimamenn byrjuðu mun betur og áttu nokkur hálffæri í upphafi leiks. Þorvaldur Árnason komst næst því að skora fyrir Stjörnuna er hann skallaði boltann hárfínt yfir mark Blikanna eftir hornspyrnu.

Breiðablik komst aðeins meira inn í leikinn eftir þetta og fóru að halda boltanum betur innan liðsins. Kristinn Steindórsson komst inn fyrir vörn Stjörnumanna og í gott færi en skot hans fór fram hjá marki heimamanna.

Blikar gerðust svo aðgangsharðir upp við mark Stjörnunnar undir lok hálfleiksins en allt kom fyrir ekki.

Þeir byrjuðu á svipuðum nótum í síðari hálfleik en enn kom ekkert úr sóknarlotum þeirra. Það vantaði einfaldlega að reka smiðshöggið á sóknarloturnar.

Eftir þetta fjaraði leikurinn einfaldlega út. Bæði lið áttu tvær hættulegar marktilraunir sem komu nánast upp úr engu. Á 66. mínútu fór boltinn af Daníel Laxdal og mátti Ingvar Kale hafa sig allan við að verja boltann í horn. Það gerði hann með miklum tilþrifum.

Þegar tíu mínútur voru til leiksloka átti svo Guðmundur Kristjánsson gott skot að marki af um 25-30 metra færi og mátti litlu muna að fast skot hans hefði hæft markið.

En þegar þarna var komið var ljóst í hvað stefndi í Keflavík og að jafnteflið myndi duga Blikum. Því var lagt ofurkapp á að verjast, halda boltanum og taka engar óþarfa áhættur. Það gekk upp og Blikar fögnuðu fyrsta Íslandsmeistaratitil félagsins í karlaflokki í leikslok.

Niðurstaðan er einfaldlega sú að Blikarnir eru vel að titlinum komnir. Þeir hafa verið lofaðir fyrir skemmtilegan sóknarleik í allt sumar en að lokum var það traustur varnarleikur sem tryggði titilinn. Liðið hélt hreinu í dag og fékk reyndar á sig fæst mörk allra liða í deildinni. Blikar unnu titilinn á markatölu sem var það góð að önnur lið voru langt frá því að ógna henni.



Stjarnan - Breiðablik 0-0

Stjörnuvöllur. Áhorfendur: 2.870.

Dómari: Gunnar Jarl Jónsson (8)

Skot (á mark): 10-10 (3-4)

Varin skot: Bjarni 4 - Ingvar 3

Horn: 9-8

Aukaspyrnur fengnar: 7-9

Rangstöður: 2-5

Stjarnan (4-3-3):

Bjarni Þórður Halldórsson 7

Bjarki Páll Eysteinsson 6

Tryggvi Bjarnason 6

Daníel Laxdal 7

Hilmar Þór Hilmarsson 6

(90. Hreiðar Ingi Ársælsson -)

Björn Pálsson 6

Halldór Orri Björnsson 7

Þorvaldur Árnason 6

Arnar Már Björgvinsson 5

Víðir Þorvarðarson 5

(79. Hafsteinn Rúnar Helgason -)

Ólafur Karl Finsen 6

Breiðablik (4-3-3):

Ingvar Þór Kale 8 - maður leiksins

Arnór Sveinn Aðalsteinsson 6

Elfar Freyr Helgason 6

Finnur Orri Margeirsson 6

Kristinn Jónsson 7

Jökull Elísabetarson 6

Guðmundur Kristjánsson 7

Olgeir Sigurgeirsson 6

Haukur Baldvinsson 5

(90. Tómas Óli Garðarsson -)

Kristinn Steindórsson 6

Andri Rafn Yeoman 5

Smelltu hér til að opna Boltavaktina og lesa lýsingu leiksins: Stjarnan - Breiðablik.