Umfjöllun: Eyjamenn féllu á lokaprófinu í Keflavík

Draumur Eyjamanna um að landa fyrsta Íslandsmeistaratitli sínum í tólf ár varð að engu í Keflavík í dag. Leikgleðin skein af heimamönnum sem unnu á endanum 4-1 sigur í leik sem náði þó að verða vel dramatískur, spennandi og skemmtilegur áhorfs.

Það rigndi og blés í Keflavík í dag og leikmenn áttu oft erfitt með að fóta sig, þá sérstaklega gestirnir. Spennustigið var greinilega hátt hjá ÍBV en liðið var hugmyndasnautt og bitlaust í sóknarleik sínum í fyrri hálfleik.

Keflvíkingar fengu hættulegri færi og þeir skoruðu eina mark fyrri hálfleiksins. Hörður Sveinsson var þá einn og yfirgefinn í teignum og kláraði vel.

Í upphafi seinni hálfleiks héldu Keflvíkingar áfram að vera hættulegri og á 74. mínútu bætti hinn ungi Arnór Ingvi Traustason, sem er á yngsta ári í 2. flokki, við marki með glæsilegu langskoti. Þetta var fyrsti byrjunarliðsleikur Arnórs í efstu deild og hans fyrsta mark.

Úkraínumaðurinn Denis Sytnik svaraði fyrir ÍBV strax í næstu sókn og viðhélt því spennunni. Eyjamenn voru komnir með völdin í leiknum og fengu vítaspyrnu á 83. mínútu þegar dæmd var hendi innan teigs. Markvörðurinn Albert Sævarsson steig á punktinn en kollegi hans, Lasse Jörgensen, sá við honum og varði.

Það má með sanni segja að þetta hafi verið vendipunktur leiksins því leikurinn var að spilast með Eyjamönnum á þessum tímapunkti og hefðu þeir náð að jafna metin hefðu áhorfendur fengið rafmagnaða spennu á lokamínútunum. En í staðinn misstu þeir hausinn og varamennirnir Magnús Sverrir Þorsteinsson og Bojan Stefán Ljubicic slátruðu leiknum.

Góður endir á ansi köflóttu tímabili Keflvíkinga. Þeir höfðu ekki að miklu að keppa í dag en mættu greinilega hárrétt gíraðir í leikinn og unnu verðskuldað. Það sáust tár á kvarmi Eyjamanna eftir leik því jafnteflið í Garðabænum gerir það að verkum að þeir hefðu orðið meistarar með sigri.

Það er staðreynd að Tryggva Guðmundssonar og Finns Ólafssonar var sárt saknað hjá ÍBV í kvöld en ævintýralegu tímabili hjá liðinu er lokið og ekkert sem segir að liðið geti ekki endurtekið leikinn að ári og gert aðra atlögu að Íslandsmeistaratitlinum.

Keflavík - ÍBV 4-1

1-0 Hörður Sveinsson (23.)

2-0 Arnór Ingvi Traustason (74.)

2-1 Denis Sytnik (76.)

3-1 Magnús Sverrir Þorsteinsson (88.)

4-1 Bojan Stefán Ljubicic (90.)

Keflavíkurvöllur

Dómari: Jóhannes Valgeirsson 7

Áhorfendur: 1.570

Skot (á mark) 13-9 (6-5)

Varin skot: Lasse 4 - Albert 2

Horn: 2-7

Aukaspyrnur fengnar: 11-8

Rangstöður: 5-3

Keflavík 4-3-3

Lasse Jörgensen 7

Guðjón Árni Antoníusson 7

Haraldur Freyr Guðmundsson 6

Bjarni Hólm Aðalsteinsson 6

Alen Sutej 6

Arnór Ingvi Traustason 8

(90. Magnús Þór Magnússon -)

Hólmar Örn Rúnarsson 8* - Maður leiksins

Andri Steinn Birgisson 7

Guðmundur Steinarsson 6

Hörður Sveinsson 7

(65. Magnús Sverrir Þorsteinsson 6)

Haukur Ingi Guðnason 7

(65. Bojan Stefán Ljubicic 7)

ÍBV 4-3-3

Albert Sævarsson 4

Arnór Eyvar Ólafsson 4

(83. Yngvi Magnús Borgþórsson -)

Eiður Aron Sigurbjörnsson 6

Rasmus Christiansen 7

Matt Nicholas Garner 5

Andri Ólafsson 4

Ásgeir Aron Ásgeirsson 3

(52. Eyþór Helgi Birgisson 5)

Þórarinn Ingi Valdimarsson 5

Tony Maweje 6

Denis Sytnik 6

Danien Justin Warlem 3

(60. Gauti Þorvarðarson 6)

Hér að neðan eru tenglar á viðtöl úr leiknum: