Heimir Hallgríms: Menn misstu hausinn eftir vítið

„Ef maður á að vera alveg sanngjarn þá var þetta verðskuldaður sigur Keflvíkinga," sagði Heimir Hallgrímsson, þjálfari ÍBV, svekktur eftir tapið gegn Keflavík. Eyjamenn hefðu með sigri orðið Íslandsmeistarar þar sem Blikar gerðu jafntefli í Garðabæ.

„Ég lít ekki á stærðina á tapinu. Við gátum jafnað í 2-2 þegar það var korter eftir en menn missa hausinn eftir þetta víti. Þegar við klúðrum vítinu vorum við með leikinn í okkar höndum á þeim tímapunkti," sagði Heimir en Lasse Jörgensen, markvörður Keflavíkur, varði vítið frá kollega sínum Alberti Sævarssyni.

„Þegar það líða einhverjir dagar þá gleðjumst við kannski yfir góðu sumri en það er ekki sjens að gera það núna. Þetta fer í reynslubankann. Ég er með mikla keppnismenn og þeir muna eftir þessum leik það sem eftir er ævinnar."

En verður Heimir áfram þjálfari ÍBV næsta sumar? „Ég veit ekkert um það. Við erum ekkert búnir að ræða þetta. Við tókum þetta strax af borðinu og ákváðum að ræða þessi mál ekkert fyrr en eftir tímabilið," sagði Heimir.