ÍBV er komið á beinu brautina í Pepsi-deild karla eftir tvo sigra í röð og það báða á Hafnarfjarðarliðunum tveimur - FH og Haukum.
ÍBV vann í dag 3-0 útisigur á Haukum og er nú komið með sjö stig eftir fyrstu fjóra leikina sem allir hafa farið fram á útivelli.
Sigurinn í dag var þó ef til vill ekki alveg eins sannfærandi og tölurnar gefa til kynna. Eyjamenn byrjuðu þó vel og náðu 2-0 forystu strax um miðbik fyrri hálfleiksins með mörkum Matt Garner og Andra Ólafssonar.
Andri fékk svo tækifæri til að gera endanlega út um leikinn stuttu síðar en skalli hans hafnaði í slá Haukamarksins.
Eftir þetta drógu Eyjamenn mjög úr sóknarþunga sínum og Haukamenn komust betur inn í leikinn. Leikmenn ÍBV héldu þó áfram að beita skyndisóknum og áttu hættulegri færi en heimamenn.
En Haukarnir voru mun betri í síðari hálfleik en í þeim fyrri. Albert Sævarsson varði alls þrívegis í stöng í leiknum og virtist leikmönnum Hauka einfaldlega fyrirmunað að skora í leiknum.
Svo þegar að Eyþór Helgi Birgisson, sóknarmaður ÍBV, fékk að líta rauða spjaldið þegar um 20 mínútur voru til leiksloka var útlit fyrir að Haukar gætu látið til sín taka á lokamínútum leiksins. En annað kom á daginn.
Fimm mínútum síðar áttu Eyjamenn hraða og snotra sókn sem lauk með því að James Hurst átti sendingu inn á teig og náði Andri að skalla boltann í markið og gera þar með endanlega út um leikinn.
Heimamenn fengu þó sín tækifæri í leiknum og Eyjamenn mega þakka fyrir að þeir nýttu ekki eitthvað af þeim. Albert Sævarsson átti stórleik í marki ÍBV og varnarmennirnir virtust allir mjög sannfærandi.
Það virtist vanta talsvert upp á sjálfstraustið hjá Haukum eiga enn eftir að vinna sinn fyrsta sigur í Pepsi-deildinni. Þeir fengu færin en fóru afar illa að ráði sínu fyrir framan mark Eyjamanna.
Haukar - ÍBV 0-3
0-1 Matt Garner (17.)
0-2 Andri Ólafsson (19.)
0-3 Andri Ólafsson (74.)
Vodafone-völlurinn. Áhorfendur: 852
Dómari: Þorvaldur Árnason (7)
Skot (á mark): 14-12 (6-7)
Varin skot: Daði 4 - Albert 6
Hornspyrnur: 4-4
Aukaspyrnur fengnar: 13-16
Rangstöður: 1-3
Haukar (4-4-2):
Daði Lárusson 7
Þórhallur Dan Jóhansson 3
Kristján Ómar Björnsson 5
Guðmundur Viðar Mete 5
Pétur Ásbjörn Sæmundsson 3
(75. Kristján Óli Sigurðsson -)
Grétar Atli Grétarsson 4
(46. Úlfar Hrafn Pálsson 6)
Guðjón Pétur Lýðsson 5
Hilmar Trausti Arnarsson 5
Sam Mantom 5
Hilmar Geir Eiðsson 7
Hilmar Rafn Emilsson 4
(46. Jónmundur Grétarsson 5)
ÍBV (4-4-2):
Albert Sævarsson 8
James Hurst 7
Eiður Aron Sigurbjörnsson 7
Rasmus Christiansen 7
Matt Garner 7
Tony Mawejje 6
Andri Ólafsson 8 - maður leiksins
(77. Arnór Eyvar Ólafsson -)
Finnur Ólafsson 6
(81. Yngvi Borgþórsson -)
Þórarinn Ingi Valdimarsson 5
(61. Ásgeir Aron Ásgeirsson 6)
Tryggvi Guðmundsson 6
Eyþór Helgi Birgisson 6
Leiknum var lýst beint á Boltavaktinni en lýsinguna má lesa hér: Haukar - ÍBV.
Umfjöllun: Eyjamenn unnu líka hitt Hafnarfjarðarliðið
