Grétar á leið til Keflavíkur

Grétar Ólafur Hjartarson er sagður á leið til Keflavíkur á vef Víkurfrétta í dag en hann hefur verið sterklega orðaður við félagið síðan ljóst varð að hann yrði ekki áfram með Grindavík.

Samningaviðræður eru sagðar á lokastigi en Grétar, sem er Sandgerðingur, hefur einnig spilað með KR á ferlinum.

Hann á að baki 72 mörk í 170 leikjum í deild og bikar með KR og Grindavík. Grétar hefur einnig verið á mála hjá Lilleström í Noregi, Landskrona í Svíþjóð og Stirling í Skotlandi. Hann á að baki einn leik með A-landsliði Íslands.

Í sumar kom hann við sögu í 20 leikjum með Grindavík í Pepsi-deild karla og skoraði í þeim þrjú mörk.