Heimdallur vill betra aðgengi að rauðvíni með steikinni

Heimdallur, félag ungra sjálfstæðismanna í Reykjavík, dreifði dreifimiðum við helstu áfengisverslanir Reykjavíkur í dag þar sem félagsmenn gagnrýndu skattlagningu ríkisins á áfengi.

„Hver fjármálaráðherrann á fætur öðrum, að meðtöldum þeim sem starfað hafa í nafni Sjálfstæðisflokksins, hefur hækkað skatta á áfengi. Nú er svo komið að álagningin er komin upp úr öllu valdi og langt umfram það sem eðlilegt getur talist. Þróunin er uggvænleg og sést best í því að greiddar eru 3704 kr. í skatta af flösku af sterku áfengi sem kostar 5000 kr. í ÁTVR en ætti með eðlilegu móti að kosta einungis 1296 kr. væri hún seld án slíkrar skattheimtu.," segir í tilkynningu sem Heimdallur sendi frá sér af þessu tilefni.

Þar segir einnig að Heimdallur hvetur fjármálaráðherra til þess að eiga frumkvæði að því að látið verði af sköttum af þessu tagi og að áfengisverslun verði færð í hendur einkaaðila.

„Það þarf ekki að vera svo öfugsnúið að kaupa rauðvín með sunnudagssteikinni, jafnvel þótt það sé bágt efnahagsástand. Hinir efnameiri hafa þann kost miklu fremur en þeir sem hafa minna milli handanna þegar svo þarf alls ekki að vera," segir í tilkynningunni.