Næst gerum við samstundis loftárás

Nýr varnarmálaráðherra Suður-Kóreu segir að þeir muni þegar í stað og án nokkurs hiks gera loftárásir á Norður-Kóreu ef landið geri sig sekt um enn eina árásina. Forvera hans var vikið úr starfi fyrir alltof væg viðbrögð þegar Norður-Kórea gerði stórskotaliðsárás á eyna Yonpyeong í lok síðasta mánaðar.

Sífellt nart

Sú árás bættist við að síðastliðið sumar sökktu norðanmenn suður-kóresku herskipi. Með því fórust 46 sjóliðar. Norður-Kóreumenn hafa á undanförnum árum margsinnis hvekkt granna sína með slíku narti. Atvikin eru yfirleitt það smávægileg að ekki hefur verið gripið til hefndaraðgerða. Það hefur líka sett sinn svip á samskipti ríkjanna að Norður-Kórea er talin eiga kjarnorkuvopn. Og ríkisstjórn landsins þykir gersamlega óútreiknanleg.

Ef marka má Kim Kwan-jin hinn nýja varnarmálaráðherra er þó mælirinn nú fullur. Sunnanmenn munu ekki líða meira nart. Lítill vafi er á að Suður-Kóreski flugherinn er fullfær um að gera árásir og valda miklu tjóni norðan landamæranna.

Norður-Kóreski flugherinn er að vísu um helmingi stærri en sá sunnanmegin. Hann samanstendur hinsvegar mest af eldgömlum og úreltum kínverskum eða rússkesnkum bardagavélum. Suður-Kóreski flugherinn er hinsvegar búinn nýjustu bandarísku orrustuþotum.

Sömu sögu er raunar að segja um landheri og flota ríkjanna. Fjöldinn er norðanmegin, en tæknin og gæðin sunnanmegin.