Samorka: Reglugerð Svandísar veldur vonbrigðum

Gústaf Adolf Skúlason - aðstoðarframkvæmdastjóri Samorku, samtaka orku- og veitufyrirtækja á Íslandi segir að ákvörðun Svandísar Svavarsdóttur umhverfisráðherra um að setja ströng viðmið um leyfilegan styrk brennisteinsvetnis í andrúmslofti valdi mönnum þar á bæ talsverðum vonbrigðum. Gústaf segir að ákvörðunin sé greinilega tekin á pólitískum forsendum en Samorkumenn töldu sig hafa unnið að málinu í góðu samstarfi við ráðuneytið og bjuggust menn við því að viðmiðin yrðu í samræmi við reglur alþjóða heilbrigðisstofnunarinnar sem leyfa 150 míkrógrömm á rúmmetra. Nýja reglugerðin er hinsvegar mun strangari og leyfir aðeins 50 míkrógrömm á rúmmetra.

„Þetta eru talsverð vonbrigði," segir Gústaf. „Ekki svo að við viljum gera lítið úr mikilvægi þess að hér sé heilbrigt andrúmsloft. En við höfðum verið í ágætu samráði við ráðuneytið að við töldum um þetta mál. Við töldum okkur hafa náð sameiginlegri niðurstöðu um að hér skyldu gilda sömu mörk og Alþjóða heilbrigðisstofnunin hefur skilgreint." Gústaf segir að sameiginlegur skilningur hafi verið um að engar faglegar forsendur væru fyrir því að hafa strangari reglur hér á landi. „Þannig að þetta er pólitísk ákvörðun að hafa þrefalt strangari reglur en WHO hefur skilgreint."

Mörk Alþjóðlegu heilbrigðisstofnunarinnar eru 150 míkrógrömm í rúmmetra og í tilkynningu frá umhverfisráðuneytinu segir að þau mörk séu sett með tilliti til mögulegra bráðaáhrifa á augu en ekki langtímaáhrifa á heilsu fólks. Umhverfisráðherra segir óvissu ríkja um heilsufarsáhrif af langvarandi innöndun brennisteinsvetnis og því hafi hún talið nauðsynlegt að setja mörkin þannig að almenningur fái notið vafans. Gústaf segir að þarna gæti miskilnings. Öryggismörk WHO séu miðað við 150 míkrógrömm en bráðamörkin sem ráðuneytið talar um eru hins vegar mun hærri, eða 15 þúsund míkrógrömm.

Gústaf segir reglugerðina geta haft gríðarlegan kostnað í för með sér fyrir fyrirtækin. „Það eru ekki allar borholur nálægt byggð. Það er því mjög blóðugt að kosta til hugsanlega tugum milljóna til þess að hafa eftirlit með því að styrkur brennisteinsvetnis fari aldrei yfir ákveðin mörk einhversstaðar úti í óbyggðum," segir Gústaf.

Gústaf segir að Samorka muni koma sínum sjónarmiðum í málinu á framfæri við umhverfisráðuneytið. „En við vorum raunar búnir að því og töldum okkur hafa náð sameiginlegri niðurstöðu með ráðuneytinu um að miða við þessi WHO mörk."