ESB gæti verið skaðabótaskylt í Icesave málinu

Evrópusambandið gæti verið skaðabótaskylt vegna gallaðrar tilskipunar um innistæðutryggingar að mati Stefáns Más Stefánsson, lagaprófessors. Hann segir að tilskipunin gæti hafa skapað réttmætar væntingar fyrir innistæðueigendur í Bretlandi um að innistæður þeirra væru tryggðar upp að 20 þúsund evrum, en svo sé ekki raunin.

Stefán Már Stefánsson lagaprófessor og Lárus Blöndal hæstaréttarlögmaður hafa kynnt sér ítarlega EES tilskipunina um innistæðutryggingar frá árinu 1994 og almennt lagalega óvissu í Icesave málinu. Helstu niðurstöður þeirra eru að Íslandi beri að sjálfsögðu að standa við allar alþjóðlegar skuldbindingar sínar. Hins vegar komast þeir að þeirri niðurstöðu að ekkert í tilskipuninni réttlæti það að gera íslenska ríkið ábyrgt fyrir bankahruni eins og átti sér stað hér á landi.

„Við vitum vel ef að stjórnvöld hafa sýnt af sér vanrækslu við innleiðingu slíkrar tilskipunar þá getur komið til bótaskylda en við höfum svo sem ekki séð neinn slíkan bótagrundvöll á borðinu," segir Stefán Már.

Í öðru lagi hafa þeir gert greiningu á því hvort að í yfirlýsingu stjórnvalda um ábyrgð ríkisins á greiðslu til innistæðueigenda hafi falist ólögmæt mismunun í skilningi EES samningsins.

„Þar getur t.d. komið til greina yfirlýsing stjórnvalda í því sambandi og líka yfirlýsing stjórnvalda um að ábyrgjast greiðslur. Við höfum greint þetta og komist að þeirri megin niðurstöðu að þarna er ekki um neina mismun í skilningi EES-samningsins."

Stefán Már segir að Evrópusambandið sjálft sé hugsanlega bótaskylt vegna gallaðrar tilskipunar um innistæðutryggingakerfið. Innlánseigendur í Bretlandi máttu vænta þess að innistæður þeirra væru í raun tryggðar upp að 20 þúsund evrum.

„Svo er hins vegar ekki raunin og þetta er alls ekki augljóst fyrir almenning. Við höldum því einfaldlega fram að tilskipunin eins og hún er orðuð og framsett hafi getað skapað réttmætar væntingar fyrir innistæðieigendur og valdið skaðabótaábyrgð fyrir Evrópusambandið," segir Stefán Már.