Þagnarskylda takmarkast við öryggi barna

Brynjar Níelsson, formaður Lögmannafélagsins, segir prestum skylt að tilkynna um brot gegn börnum. Að hans mati lýkur þagnarskylda presta þegar kemur að barnaverndarlögum. Þagnarskylda víkur þannig fyrir tilkynningarskyldu.

Brynjar tekur þar með undir með Rögnu Árnadóttur, dómsmálaráðherra, sem sagði í samtali við Vísi í gær tilkynningaskyldu ganga framar öðru.

Ummæli séra Geirs Waage, sóknarprest í Reykholti, um að prestum bæri ekki að tilkynna vitneskju sína um kynferðisbrot gagnvart börnum vöktu hörð viðbrögð. Karl Sigurbjörnsson, biskup, sá ástæðu til að senda frá sér yfirlýsingu vegna málsins þar sem hann mótmælti orðum Geirs. Hann hyggst funda fljótlega með sóknarprestinum vegna málsins. Þá hafa nokkrir prestar mótmælt ummælum Geirs og jafnframt kallað eftir því að biskup leysi hann frá störfum.

Brynjar var gestur í þættinum Í bítið á Bylgjunni í morgun. Þar vísaði hann til barnaverndarlaga og sagði þá sem starfa að málefnum barna skylt að tilkynna um brot gegn þeim. „Þannig að þagnarskyldan hvað þau mál varðar víkur fyrir þessari tilkynningarskyldu."

Brynjar sagði menn kunna að hafa mismunandi skoðanir á því hvort túlki eigi lögin með hliðsjón af lögum um meðferð sakamála. Brynjar benti á að barnaverndarlögin væru sérlög og jafnframt yngri. „Þarna er bara verið að takmarka þessa þagnarskyldu og menn verða að una því hvort sem mönnum líkar það betur eða verr."

Hægt er að hlusta á viðtalið hér.