Búið að draga níu stig af Portsmouth

Enska úrvalsdeildin hefur staðfest refsingu Portsmouth og níu stig hafa verið dregin af félaginu. Ekkert annað en fall úr deildinni blasir því við Hermanni Hreiðarssyni og félögum.

Portsmouth er í lang neðsta sæti deildarinnar og sautján stigum frá öruggu sæti þegar aðeins níu umferðir eru eftir.

Stigin eru dregin af Portsmouth þar sem félagið var sett í greiðslustöðvun. Hermann verður því að öllum líkindum sá fyrsti í sögunni til að falla með fimm mismunandi félögum úr ensku úrvalsdeildinni.