Arnarnesræningjarnir dæmdir

Tveir menn, þeir Kristján Víðir Kristjánsson og Hlynur Ingi Bragason, voru í dag dæmdir í fangelsi fyrir að ráðast inn á eldri hjón á Arnarnesi í apríl, svipta þau frelsi og ræna þau. Laufey Jóhanna Sigurpálsdóttir var einnig dæmd fyrir aðkomu sína að ráninu, auk stúlku sem er barnabarn hjónanna.

Kristján hlaut tveggja og hálfs árs dóm en Hlynur tveggja ára auk ævilangrar ökuleyfissviptingar. Frá refsingu þeirra dregst rúmlega tveggja mánaða gæsluvarðhaldsvist. Laufey hlaut fimmtán mánaða dóm, en barnabarn hjónanna fimm mánuði skilorðsbundna. Horft var til ungs aldurs hennar, en hún var á sautjánda ári þegar brotið var framið.

Vantaði fé fyrir fíkniefnum

Barnabarn hjónanna hafði lagt til að farið yrði inn á heimilið þar sem verðmæti væru að finna auk þess sem hún lýsti innviðum hússins. Þau voru öll í fíkniefnaneyslu og þurftu verðmæti til að kaupa fíknefni.

Þeir Kristján Víðir Kristjánsson og Hlynur Ingi Bragason fóru ránshendi um heimilið á meðan stúlkurnar biðu í bifreið fyrir utan. Þeir hringdu dyrabjöllu hússins og ruddust inn þegar eldri kona kom til dyra. Hún hafði verið að horfa á sjónvarp með manni sínum á neðri hæð hússins.

Hótaði að stinga hjónin

Kristján Víðir greip konuna og tók fyrir vit hennar með báðum höndum, sneri hana niður í gólf og skipaði henni að taka af sér alla skartgripi. Hann sló hana þremur þungum höggum í höfuðið er hún reyndi að komast á fætur og skipaði henni síðan að liggja á gólfinu með andlitið niður. Konan hlaut ýmis meiðsli á efri hluta líkamans vegna árásarinnar.

Á meðan fór Hlynur Ingi í kjallara hússins þar sem eiginmaðurinn sat, lagði að honum hníf og hótaði að stinga hann ef hann hlýddi honum ekki. Hlynur færði hann síðan til konu sinnar og skipaði honum að liggja kyrr við hlið hennar.

Hlynur gætti að hjónunum á meðan Kristján fór ránshendi um heimilið, og hótaði ítrekað að stinga þau ef þau litu upp. Áður en mennirnir yfirgáfu heimilið skáru þeir í sundur símalínur og hótuðu að skjóta hjónin á færi ef þau hreyfðu sig næstu tíu til fimmtán mínúturnar.

Ránsferðin varði um tuttugu til þrjátíu mínútur.

Gripin við að selja góssið

Mennirnir héldu síðan á braut í bifreið sem Laufey Jóhanna Sigurpálsdóttir keyrði undir áhrifum fíkniefna, ásamt barnabarni hjónanna. Þeir höfðu með sér seðlaveski með fimmtíu þúsund krónum, fartölvu, farsíma, veggsíma og skartgripi að verðmæti rúmrar milljónar króna.

Sumt var selt og reynt að selja annað. Upp komst um Laufeyju og Kristján þegar þau reyndu að selja gullsmið í Pósthússtræti góssið.