Kristján Ara með 893 milljóna kúlulán

Kaupþing lánaði starfsfólki sínu samtals 47,3 milljarða til hlutabréfakaupa í bankanum árið 2006. Þetta kemur fram í DV í dag en blaðið hefur lánabækur bankans frá árinu 2006 undir höndum. Í blaðinu er meðal annars greint frá því að Kristján Arason, þáverandi framkvæmdastjóri viðskiptabankasviðs hafi fengið 893 milljónir að láni í formi svokallaðs kúluláns.

Helgi Sigurðsson, yfirlögfræðingur Kaupþings tók einnig lán til hlutabréfakaupa upp á tæpar 450 milljónir en hann gaf yfirstjórn bankans samþykki sitt fyrir því að persónulegar ábyrgðir starfsfólk vegna hlutabréfakaupa í bankanum yrðu felldar niður. Helgi segist í samtali við blaðið ekki hafa unnið álitið um niðurfellingu ábyrgðanna þótt hann beri vissulega ábyrgð á álitinu sem yfirlögfræðingur.

Í frétt um þessi mál á Vísi í lok febrúar kom fram að Hreiðar Már Sigurðsson, fyrrverandi forstjóri Kaupþings, stofnaði félag í sínu nafni og fékk lán til hlutabréfakaupanna í bankanum. Lánið hljóðaði upp á tæpan þrjá og hálfan milljarð og er kúlulán, með greiðslu árið 2011.