Ræða Davíðs í heild sinni - myndband

Davíð Oddsson sagði meðal annars í merkilegri ræðu sinni á landsfundi Sjálfstæðisflokksins að ekki væri við nýjan seðlabankastjóra að sakast þó hann væri ókunnugur öllu sem hér hefði verið að gerast undanfarið. Það hafi hinsvegar ekki verið traustvekjandi þegar hann sagðist ekki muna eftir því hvenær fyrst var rætt við hann um starfið á fyrsta blaðamannafundi sínum. Það væri í senn sérkennilegt og mjög alvarlegt.

„Annaðhvort er hann með alzheimer á mjög alvarlegu stigi eða að hann sagði blygðunarlaust ósatt þegar hann fékk sitt fyrsta tækifæri til þess að tala við íslendinga. Ég vona hans vegna að þetta sé alzheimerinn svo hann gleymi þessari óláns uppákomu sem verklausa minnihlutastjórnin setti hann í."

Hann sagði nokkra annmarka hafa verið á ráðningunni sem hefði gengið geg settum lögum í landinu. Skömmu eftir ráðninguna hefði Straumur banki farið á hausinn en hann sjálfur þekki vel til málefna bankans.

„Ég tel ekki útilokað að þarna hafi verið um vanþekkingu aðkomu mannsins að kenna, auk þess sem fjármálaeftirlitið var höfuðlaus her eftir stórkostleg afglöp viðskiptaráðherra," sagði Davíð sem ekki telur útilokað að íslenska ríkið sé skaðabótaskylt gagnvart fjölmörgum aðilum þar sem úrslitaákvarðanir hafi verið teknar af aðila sem alls ekki var fær til þess að taka.

„Það sama á við um SPRON og Sparisjóðabankann."

Hann sagði það hafa verið hárrétt mat hjá Geir H. Haarde að Samfylkingin hefði farið á taugum við fyrstu kippi efnahagslegra jarðhrærðinga á Íslandi.

Össur Skarphéðinsson hafi þó talið að öllu væri borgið með því að birta nægilega margar litmyndir af sér og Ólafi Ragnari Grímssyni með einhverjum sjeik frá katar. „Svo þegar kom á daginn að sjeik þeirra Ólafs reyndist vera milk-sjeik með óbragði þá fór allur vindur úr köppunum og næstu dagar fóru í að fækka með hraði litmyndunum af netsíðum hér og þar."

Hægt er að horfa á ræðu Davíðs í heild sinni með þessari frétt.