Breið samstaða ákaflega dýrmæt

Magnús Már Guðmundsson skrifar 28. ágúst 2009 09:11

Jóhanna Sigurðardóttir, forsætisráðherra, segir breiða samstöðu í Icesave málinu ákaflega dýrmæta fyrir framhaldið. Hún segir næsta verkefni ráðamanna vera að sannfæra Breta og Hollendinga um að íslenska þjóðin sé ekki að hlaupast undan ábyrgð heldur þvert á móti að axla ábyrgð.

Þingfundur hófst á klukkan níu en þá var þriðju og lokaumræðu um ríkisábyrgð vegna Icesave haldið áfram. Einn fulltrúi frá öllum flokkum mun flytja 10 mínútna ræðu en atkvæðagreiðsla um frumvarpið hefst klukkan tíu.

Jóhanna sagði aldrei áður hafi verið eins mikið gagnsæi í umfjöllun Alþingis um alþjóðasamninga. Nú væri aftur á móti brýnt að hleypa krafti í efnahagslífið svo byrðar íslensku þjóðarinnar verði ekki of þungar á næstu árum.

Tengdar fréttir

Fyrirvararnir styrkja samningana

Fyrirvarar Alþingis við Icesave samningana við bresk og hollensk stjórnvöld styrkja samningana, að mati Steingríms J. Sigfússonar fjármálaráðherra. Í umræðum á Alþingi í morgun sagði hann að í umræðunni um samningana undanfarin misseri hafi verið reynt að færa sökina frá þeim sem orsökuðu vandamálið yfir á þá sem bera ábyrgð á því að leysa málið. Hann sagðist ekki telja að sú söguskýring muni halda í framtíðinni. „Það gat aldrei komið lítill og sætur samningur til að leysa úr svona stóru máli."

28. ágúst 2009 09:36

Styttist í Icesave-atkvæði

Þriðja og síðasta umræða um Icesave-málið hefst á Alþingi klukkan tíu og verða atkvæði greidd um málið í dag.

28. ágúst 2009 07:13

Fellum samningana og gerum nýja

Sigmundur Davíð Gunnlaugsson, formaður Framsóknarflokks, gagnrýndi ríkisstjórnina fyrir framgöngu sína í Icesave málinu við upphaf þingfundar í morgun. Hann lagði til að frumvarpið um ríkisábyrgð yrði fellt og nýr samningur gerður.

28. ágúst 2009 09:43

Atkvæði um Icesave greidd í dag

alþingi Þingmenn stjórnarandstöðuflokkanna létu ríkisstjórnina – og þá sér í lagi Steingrím J. Sigfússon fjármálaráðherra – heyra það í þriðju umræðu um Icesave-frumvarpið sem stóð á Alþingi í allan gærdag og fram á kvöld. Töldu þeir stjórnvöld hafa haldið illa á málinu og í raun klúðrað því. Ætlan þeirra hafi verið að keyra málið óbreytt í gegnum þingið en til allrar lukku hafi það breyst mjög til betri vegar.

28. ágúst 2009 01:00

Ríkisstjórnin treystir á minnihlutann

Bjarni Benediktsson, formaður Sjálfstæðisflokksins, segir það vera hættumerki að ríkisstjórnin vilji keyra Icesave málið í gegnum Alþingi þrátt fyrir litla samstöðu í þinginu. Ríkisstjórnin stefni í fen því hún verði aldrei neitt annað en valdabandalag Samfylkingar og Vinstri grænna sem treysti á stjórnarandstöðuna að leysa úr erfiðustu vandamálum sínum. Íslenska þjóðin eigi mun betra skilið.

28. ágúst 2009 09:19