Konan frá Litháen fannst í Reykjavík

16. október 2009 11:13

Litháíska konan sem Lögreglan á Suðurnesjum lýsti eftir í gær fannst í Reykjavík rétt fyrir miðnættið. Eftir umfjöllun fjölmiðla um málið barst lögreglunni ábending um hvar hún kynni að vera niðurkomin og var hún handtekin.

Í tilkynningu frá lögreglu segir að mál konunna sæti áframhaldandi rannsóknar og beinist hún meðal annars að því að upplýsa hver hún er auk þess sem rannsakað er hvort mansal komi við sögu í málinu. Konan hélt því fram við komuna til landsins um síðustu helgi að hún ætti að stunda vændi hér á landi.

Þrír Litháar voru handteknir grunaðir um aðild að málinu og rennur gæsluvarðhald yfir þeim út síðar í dag. Að sögn lögreglu verður farið fram á áframhaldandi varðhald á grundvelli rannsóknarhagsmuna.

„Talið er víst að fjórði maðurinn, Vitalius Gejer, sem lýst var eftir vegna málsins í gær, hafi farið af landi brott í síðust viku. Ekki er vitað hvenær eða hvort hann muni snúa aftur til landsins," segir ennfremur í tilkynningunni.

Almenningi og fjölmiðlum þökkuð veitt aðstoð

Að lokum þakkar lögreglan á Suðurnesjum almenningi og fjölmiðlum fyrir „frábæra aðstoð við rannsókn málsins en fjölmargar ábendingar bárust lögreglu frá almenningi og mikil umfjöllun fjölmiðla átti sinn þátt í að konan fannst eins fljótt og raun varð á."

Tengdar fréttir

Stúlkan frá Litháen komin í leitirnar

Stúlkan sem lögreglan á Suðurnesjum lýsti eftir vegna meints mansals er fundin. Hún er í vörslu lögreglunnar og er mál hennar til rannsóknar. Búist er við því að lögreglan sendi frá sér fréttatilkynningu vegna málsins þegar nær dregur hádegi. Stúlkan sem ferðaðist undir nafninu Leva Grisiúte með stolnum skilríkjum kom hingað til lands með flugi síðastliðið föstudagskvöld og var flutt rænulítil á sjúkrahús eftir að hafa látið ófriðlega í flugvélinni síðasta hluta leiðarinnar.

16. október 2009 06:26

Trylltist í flugvél - átti að verða vændiskona á Íslandi

Þrír karlmenn voru í gær úrskurðaðir í gæsluvarðhald í Héraðsdómi Reykjaness í tengslum við meint mansalsmál. Upphaf þess má rekja til komu ungrar litháeskrar konu til landsins um síðustu helgi, en hana þurfti að binda niður í sæti flugvélar Iceland Express eftir að hún hafði veist að öðrum farþegum í vélinni.

15. október 2009 12:36

Konan sem trylltist horfin - lýst eftir henni og einum Litháanna

Lögreglan á Suðurnesjum lýsir eftir litháískri konu sem grunur leikur á að sé fórnarlamb mansals. Konan ferðaðist hingað til lands undir nafninu Ieva Grisiúte en talið er að ferðaskilríkin sem hún framvísaði séu stolin.

15. október 2009 12:44

Mest lesið

Fleiri fréttir