Ríkisstjórn Taiwans ætlar að segja af sér

Ríkisstjórn Taiwans ætlar að segja af sér eftir mikla gagnrýni á því hvernig hún brást við þegar fellibylurinn Morakot gekk yfir landið í ágúst síðastliðnum. Talið er að 758 manns hafi farist þegar fellibylurinn Morakot gekk yfir Taiwan í byrjun ágúst. Eignatjón var gífurlegt.

Stjórnvöld hafa síðan legið undir miklu ámæli fyrir sein viðbrögð. Það á við bæði um forseta landsins og ríkisstjórnina í heild. Liu Chao-shiuan forsætisráðherra hefur nú ákveðið að falla á sverð sitt til þess að reyna að stilla til friðar.

Hann tilkynnti á fundi með fréttamönnum í dag að hann hefði lagt afsögn sína fyrir Ma Ying-jeou forseta og forsetinn hefði fallist á hana.

Forsætisráðherrann sagði einnig að ríkisstjórn hans myndi öll segja af sér síðar í vikunni. Vonast er til að með þessu verði Ma forseta fært að sitja áfram en forsetinn er í raun sá sem valdið hefur á Taiwan.