Rourke er vinur Seans Penn

Talsmaður Mickey Rourke hefur vísað því á bug að leikarinn eigi í illdeilum við Sean Penn. Orðrómur þess efnis hefur verið á kreiki á vefsíðum þar vestra. The Daily Beast greindi frá því að Rourke hefði sent háttsettum framleiðanda í Hollwyood sms-skeyti þess efnis að Sean Penn væri haldinn hommahatri. Og að það sýndi sig hvað best í túlkun leikarans á hinum samkynhneigða stjórnmálamanni Harvey Milk en kvikmynd um hann. Milk, var frumsýnd nýverið í Bandaríkjunum.

Samkvæmt Daily Beast munu textaskilaboðin hafa innihaldið þennan texta: „Sean er gamall vinur minn en mér fannst frammistaðan hans ótrúverðug. Mér fannst þetta í mesta lagi algjör meðalmennska auk þess sem Penn er einhver mesti hommahatari sem ég þekki.“

Rourke brást ókvæða við þessum fréttum en þeir hafa báðir verið nefndir sem líklegir kandítatar til Óskarsverðlauna. „Ekkert stríð er í gangi milli Rourke og Penn, langt því frá. Þeir eru gamlir vinir og Rourke mætti meðal annars á frumsýningu myndarinnar til að sýna honum stuðning sinn. Þetta er algjör vitleysa,“ sagði talsmaður Rourke.