Bankarnir bregðast í útlánum

Norsku viðskiptabankarnir hafa ekki orðið við beiðni seðlabankans um að auka útlán sín. Þvert á móti hafa þeir hert útlánareglur til muna.

Í byrjun desember á síðasta ári sagði Svein Gjerdrem seðlabankastjóri að það væri mikilvægt að bankarnir drægju ekki úr útlánum þar sem það gæti aukið niðursveifluna í Noregi. Það hefur sumsé fallið á dauf eyru.

Mervyn King bankastjóri Englandsbanka bar fram sömu ósk og hinn norski starfsbróðir hans í síðustu viku. Og fékk sömu viðbrögð.

Ríkisstjórnir út um allan heim hafa ausið milljörðum og aftur milljörðum í að reyna að örva hagkerfið. Það hefur lítil áhrif haft á viðskiptabankana sem liggja á aurum sínum eins og ormar á gulli.

Meðan svo er versnar staða fyrirtækja dag frá degi. Þeim er hreinlega að blæða út vegna skorts á rekstrarlánum.