Hollendingar rannsaka stuðning við innrásina í Írak

Forsætisráðherra Hollands fyrirskipaði í dag að óháð nefnd verði fengin til þess að rannsaka stuðning ríkisstjórnarinnar við innrásina í Írak árið 2003.

Eins og Íslendingar sendu Hollendingar enga hermenn til Íraks, en studdu innrásinna vegna fregna af gereyðingarvopnum. Þær fregnir voru ekki á rökum reistar.

Nokkrir alþjóðlegir dómstólar eru í Hollandi og gagnrýnendur hafa haldið því fram að stuðningurinn við innrás stefndi þeim í voða.

Rannsóknarnefndin á meðal annars að skoða hvort ríkisstjórnin hafi hlustað á álit sinna eigin lögfræðinga um stuðninginn.

Nefndin á að skila niðurstöðu sinni í nóvember. Ríkisstjórn Hollands stendur nú frammi fyrir því að ákveða hvort hollenskar hersveitir verði í Afganistan framyfir árið 2010.