Vill veita skattaafslátt í skiptum fyrir upplýsingar

Bryndís Kristjánsdóttir skattrannsóknarstjóri vill að skoðaður verði möguleiki á að veita fjármagnseigendum sem eiga fé á huldureikningum erlendis skattaafslátt, veiti þeir sjálfviljugir upplýsingar um innistæður sínar.

„Það má segja að þetta sé tvíbent," segir Bryndís í viðtali í kvöldfréttum Rásar eitt.

„Annars vegar er verið að ná inn eignum og fjármunum sem skattayfirvöld ætti að öðrum kosti erfitt með að ná utan um. Hinsvegar er með þessu verið að gefa ákveðinn afslátt af lögbundnum viðurlögum við brotum."

Í frétt RÚV kemur fram að bresk yfirvöld hafi þegar ákveðið að veita breskum fjármagnseigendum sem geyma fé á leynilegum reikningum í Liecthenstein álíka ívilnun.

Bryndís segir stjórnvöld hér ekki hafa veitt slíkan afslátt, en vert sé að skoða þann möguleika.