Hull ætlar að klófesta Owen

Michael Owen verður brátt á lausu og munu mörg félög á Englandi klárlega reyna að fá hann í sínar raðir. Hull City er eitt þeirra og hefur ólíkt flestum öðrum ekki farið leynt með áhuga sinn á leikmanninum.

Hull mun setja sig í samband við umboðsmann Owen eftir helgina.

Þar sem leikmaðurinn fæst á frjálsri sölu má Owen gera ráð fyrir því að fá feitan launapakka og spurning hvort lið eins og Hull ræður við slíkan pakka.

Phil Brown, stjóri Hull, segir að félagið sé vel samkeppnishæft á markaðnum og muni reyna til þrautar að landa Owen.