Tóku út helmingi hærri arð en skuldin sem þeir vilja fá fellda niður

Björgólfsfeðgar tóku helmingi hærri arð út á hlutabréf sín í Landsbankanum en sem nemur skuldinni sem þeir vilja nú fá fellda niður. Skuldin er tilkomin vegna kaupa þeirra á hlutabréfunum í bankanum.

Samson, eignarhaldsfélag í eigu Björgólfsfeðga og þá Magnúsar Þorsteinssonar, keypti 45,8 prósenta hlut ríkisins í Landsbankanum í árslok 2002. Kaupverðið var þá 11,2 milljarðar króna. Krafa Kaupþings á hendur þeim feðgum er tilkomin vegna þessara kaupa. Upphaflega hljóðaði lánið upp á 4,9 milljarða króna en stendur í dag í tæpum 6 milljörðum með dráttarvöxtum og öðrum áföllnum kostnaði. Feðgarnir gerðu Kaupþingi tilboð um að greiða um fimmtíu prósent af skuldinni, eða þrjá milljarða, en þeir eru í persónulegri ábyrgð fyrir láninu.

Sé litið á arðgreiðslur sem hluthafar Landsbankans fengu þann tíma sem Björgólfsfeðgar voru stærstu hluthafar bankans má sjá að alls voru tæpir 10 milljarðar greiddir í arð. Arðgreiðslurnar fóru frá því að vera um 10% af hagnaði og upp í um 13%. Enginn arður var þó greiddur út 2007 en þá var öllum hagnaði ráðstafað til hækkunar á eigin fé bankans. Á þessum tíma sveiflaðist eignarhald feðganna á bankanum frá um 41% og upp í 55% en var að meðaltali í kringum 45%. Af því gefnu má sjá að Samson, eignarhaldsfélag þeirra feðga, fékk um fjóran og hálfan milljarð í arðgreiðslur á þessu tímabili. Sú upphæð er helmingi hærri en sem nemur skuldinni sem þeir vilja nú fá fellda niður. Auk þess sem hún er næstum jafn há og upphaflega skuldin.