Stjórnin undrast harkalegar aðgerðir FME og fjármálaeftirlitsins

Stjórn Lífeyrissjóðs starfsmanna Kópavogsbæjar lýsir furðu sinni á hörðum aðgerðum Fjármálaeftirlitsins og fjármálaráðuneytisins, sem skipað hafa umsjónarmann með sjóðnum, þrátt fyrir að stjórn hans og framkvæmdastjóri hafi ítrekað og að eigin frumkvæði upplýst fulltrúa Fjármálaeftirlitsins um fjárfestingar hans. Þetta kemur fram í tilkynningu frá sjóðnum.

Fjármálaráðherra hefur að tillögu Fjármálaeftirlitsins skipað lífeyrissjóðnum umsjónaraðila vegna gruns um lögbrot.

Í yfirlýsingu stjórnar lífeyrissjóðsins segir að í efnahagsumrótinu á umliðnum vetri hafi stjórn sjóðsins tekið yfirvegaða og upplýsta ákvörðun um, að besta leiðin til að verja hagsmuni sjóðfélaga væri að ávaxta laust fé sjóðsins til skamms tíma hjá Kópavogsbæ, þótt það væri ekki í fullu samræmi við heimildir, enda beri Kópavogsbær fulla ábyrgð á öllum skuldbindingum sjóðsins umfram eignir.

Í yfirlýsingunni er vitnað í endurskoðunarbréfi PricewaterhouseCoopers með ársreikningi lífeyrissjóðsins fyrir 2008, en þar segir:

„Þótt ekki sé ástæða til að draga í efa að með þessum ráðstöfunum sínum hafi stjórnendur sjóðsins talið sig vera að tryggja sem best hag sjóðsins við óvenjulegar efnahagsaðstæður þá verður ekki hjá því komist að við sem endurskoðendur sjóðsins, sbr. 42. gr. [laga nr. 129/1997], gerum stjórn sjóðsins og Fjármálaeftirlitinu þegar í stað viðvart um þessi atvik."

Þá segir að á fundi sem lífeyrissjóðurinn boðaði til með fulltrúum Fjármálaeftirlitsins 19. maí hafi verið gert samkomulag um að sjóðurinn hefði frest til 31. júlí til að gera úrbætur í samræmi við fjárfestingarheimildir. Það samkomulag hafi Fjármálaeftirlitið og fjármálaráðuneytið ákveðið nú að virða ekki.

Um sé að ræða verðtryggt skuldabréf, útgefið af Kópavogsbæ, sem var undir lögbundnu 10% hámarki af heildareignum lífeyrissjóðsins, þegar það var gefið út. „Vegna verðbólgu og áfallinna vaxta auk eignarýrnunar LSK í tengslum við bankahrunið, fór uppreiknað verð bréfsins yfir 10% hámarkið í 10,57% af heildareignum sjóðsins."

Vegna góðrar ávöxtunar sjóðsins það sem af er árinu, er hlutfallið nú þegar orðið lægra og innan lögboðinna marka. Í lok tilkynningarinar segjast stjórnarmenn treysta því, að þegar fjármálaráðuneytið og Fjármálaeftirlitið hafi kynnt sér málið að fullu liggi fyrir að hagsmunir sjóðfélaga hafi verið hafðir að leiðarljósi.