Nýtt gagnaver gæti skapað tugi starfa

„Ég sé fyrir mér að hægt sé að draga mikil viðskipti hingað," segir Ólafur, Sigurvinsson, rekstrarstjóri nýja gagnavistunarfyrirtækisins DataCell. Reiknað er með að fyrirtækið hefji rekstur í september með þjónustu við fyrstu viðskiptavinina á Íslandi.

DataCell var stofnað hér á landi í síðustu viku og kemur til með að reka gagnaver hér með fullri þjónustu, en einnig í Sviss, Bretlandi, Finnlandi og Bandaríkjunum. Stefnt er að því að höfuðstöðvar fyrirtækisins verði á Íslandi.

Um 200 fyrirtæki, einkum erlend, hafi þegar óskað eftir hýsingu gagna í gegnum heimasíðu fyrirtækisins, Datacell.com, samkvæmt Ólafi.

Ólafur segir að lega landsins, stöðugt stjórnmálaástand og ódýr raforka eigi allt í senn þátt í því hversu samkeppnishæft Ísland sé á þessum markaði.

Hann segir að ef allt gangi upp gæti fyrirtækið ráðið allt að sextíu til sjötíu manns þegar reksturinn er kominn á fullt.