Uppsagnir í Japan 230.000 á árinu

Atvinnuleysi í Japan mælist nú 5,7 prósent og hefur ekki verið meira síðan í síðari heimsstyrjöldinni.

Japanskir vinnuveitendur hafa sagt 230.000 manns upp störfum það sem af er árinu og hefur framleiðslugeirinn orðið einna verst úti, svo sem bifreiðaverksmiðjur. Toyota líður til dæmis fyrir það að stór hluti framleiðslunnar fer að jafnaði á Bandaríkjamarkað þar sem samdráttur í sölu nýrra bíla hefur verið umtalsverður síðan efnahagskreppan skall á.

Kamematsu Marimoto er 55 ára gamall, á tvö barnabörn og hefur fyrir sex manna fjölskyldu að sjá. Hann missti vinnuna í vor og hefur verið á atvinnuleysisbótum síðan. Til að fá slíkar bætur í Japan mega menn ekki eiga bíl og neyddist Marimoto til að selja fjölskyldubílinn til að hljóta bætur. Hann notar hvern einasta dag til að leita sér að vinnu en hefur ekki haft erindi sem erfiði. Dæmi eru um að á annað hundrað manns sæki um eina stöðu og hefur umferðin þyngst verulega hjá súpueldhúsum sem bjóða heimilis- og atvinnulausum upp á súpu og ýmsa aðstoð.

Félagslega kerfið í Japan er ekki upp á marga fiska og er til dæmis algengt að starfsfólk búi í húsnæði sem vinnuveitandi útvegar. Þetta gerir það að verkum að þegar uppsagnarfresti fólksins lýkur þarf það að rýma húsnæðið og endar á götunni.