Grímulaus hræðsluáróður útgerðarmanna

Skúli Helgason, þingmaður Samfylkingarinnar, segir útgerðarmenn og talsmenn þeirra á Alþingi fara mikinn í varðstöðu fyrir óbreyttu fiskveiðistjórnarkerfi og beiti grímulausum hræðsluáróðri.

„Hræðsluáróðurinn er grímulaus, á stundum ósvífinn og bregður jafnvel um sig skikkju súrrealismans eins og þegar formaður Sjálfstæðisflokksins lýsti því yfir í umræðum um stefnuræðu forsætisráðherra að það fæli í sér þjóðnýtingu ef kvótakerfið yrði endurskoðað í samræmi við áherslur stjórnarflokkanna," segir Skúli í pistli á heimasíðu sinni og bætir við að þjóðnýting feli í sér eignaupptöku ríkisins á eigum í einkaeign.

Áform ríkisstjórnarinnar um fyrningarleiðina svokölluðu, sem felur í sér innköllun aflaheimilda á 20 árum, hefur vakið hörð viðbrögð LÍÚ og ýmissa bæjarfélaga sem og stjórnmálamanna.

Skúli vísar í lög um um stjórn fiskveiða þar sem segir að nytjastofnar á Íslandsmiðum séu í sameign íslensku þjóðarinnar. Stefna ríkisstjórnarinnar sé að þjóðin endurheimti það sem henni ber samkvæmt lögum. Að kalla það þjóðnýtingu er fráleitur viðsnúningur á staðreyndum, að mati Skúla.

Þingmaðurinn segir að endurskoðun kvótakerfisins sé bráðnauðsynleg aðgerð sem njóti stuðnings mikils meirihluta þjóðarinnar.

„Kvótakerfið er pólitískt afkvæmi Sjálfstæðisflokks og Framsóknarflokks, sú aðferð við að úthluta almannagæðum til einkaaðila sem þar var staðfest hefur verið kölluð mesta ranglæti Íslandssögunnar, um kerfið ríkir enginn friður meðal landsmanna og tveir þriðju hlutar þjóðarinnar vilja sjá því breytt," segir Skúli.

Pistilinn er hægt að lesa hér.