Tekið verður markvisst á kynjamisvægi í ríkisstofnunum

„Þetta er náttúrulega óæskilegt misvægi," segir Árni Páll Árnason, félagsmálaráðherra, um hið mikla kynjamisvægi meðal stjórnenda ríkisstofnana. Eins og fram kom á Vísi í gær er sjö af hverjum tíu ríkisstofnunum stjórnað af körlum.

„Það er erfitt við þetta að eiga fyrr en stöðurnar losna. Þetta undirstrikar þó mikilvægi þess að menn taki á þessu með skilvirkum hætti þegar að því kemur," segir Árni Páll. Hann á von á að það verði gert markvisst í tíð þessarar ríkisstjórnar.

„Þessi samantekt er mjög holl og góð og sýnir okkur að það er full ástæða til halda vel á spöðunum," segir Árni að lokum.

Það skal þó tekið fram að félagsmálaráðuneytið kom best út í samantektinni, þar sem átta stofnunum á vegum ráðuneytisins er stjórnað af körlum, en sjö af konum.