Finnst ójafnt kynjahlutfall sláandi

„Þetta eru sláandi tölur þegar maður sér þær svona á blaði," segir Þórunn Sveinbjarnardóttir, þingmaður Samfylkingarinnar, um kynjahlutfall forstjóra ríkisstofnana.

Eins og fram kom í frétt Vísis fyrr í dag er sjö af hverjum tíu ríkisstofnunum stjórnað af körlum. Kom það í ljós í svörum ráðherra við fyrirspurn Þórunnar í þinginu.

„Þetta staðfestir það sem maður vissi, að í langflestum ríkisstofnunum eru karlmenn í mjög miklum meirihluta."

„Þetta sýnir manni svart á hvítu að baráttan fyrir jöfnum hlut kvenna allsstaðar í samfélaginu er sannarlega ekki lokið."

Þórunn er þeirrar skoðunar að nýta beri þá endurreisn sem senn fer í hönd til að gera hlut kvenna í stjórn samfélagsins og stofnunum ríkisins stærri.

Hún bendir þó á að margir karlanna hafi setið lengi, og hlutur kvenna sé stærri í nýráðningum á vegum ráðuneytanna.