Atvinnuleysi viðskiptamenntaðra tólffaldaðist undanfarið ár

Sjö sinnum fleiri kennarar eru atvinnulausir nú en á sama tíma í fyrra og tólf sinnum fleiri viðskipta- og hagfræðingar. Helmingur atvinnulausra eru með framhaldsmenntun eða er faglærður.

Alls eru nú fimmtán þúsund og átta hundruð manns atvinnulausir hér á landi. Um helmingur þeirra eru ófaglærðir, það er að segja með grunnám eða engin próf.

Fréttastofa rýndi í atvinnuleysi nokkurra hópa samfélagsins. Tölur eru byggðar á upplýsingum frá vinnumálastofnun, stéttarfélögum og fagfélögum.

Atvinnuleysi meðal rafiðnaðarmanna hefur stóraukist á einu ári, en alls eru nú um 380 í þeirri stétt atvinnulausir. Til samanburðar voru þeir 19 í fyrra.

39 sjúkraliðar eru nú atvinnulausir samanborið við 2 skráða í fyrra.

Þá eru 140 manns með kennarapróf atvinnulausir og eru því sjö sinnum fleiri atvinnulausir í kennarastéttinni nú en síðasta sumar.

Alls eru 440 viðskipta og hagfræðingar atvinnulausir, eða 7% þess hóps. Þeir voru 34 í júní í fyrra.

Atvinnuleysi er tiltölulega lítið meðal lögfræðinga - 50 lögfræðingar eru á atvinnuleysisskrá. Það eru 3,4% af áætluðum heildarfjölda lögfræðinga hér á landi.