Hryllilegt barnamorð: Óhugnanlegar upptökur fundust á vettvangi

Lögreglan í Manchester fann óhugnanlegt myndband af systkinunum Theo Molemohi, sem var tveggja ára, og Yolöndu, sem var fjögurra ára, þar sem þau kvöddu móður sína. Systkinin voru myrt á heimili föður síns en móðir þeirra kom að þeim. Faðirinn, Petros Mwashita, er grunaður um verknaðinn en hann var búinn að taka of stóran skammt af lyfjum þegar lögreglan kom á vettvang.

Börnin höfðu verið kyrkt en foreldrar þeirra voru nýskilin. Móðirin hafði gefið börnunum leyfi til þess að dvelja hjá föður sínum í nokkra daga. Á miðvikudaginn kom hún síðan inn á heimili hans og fann þá börnin sín látin.

Samkvæmt The Daily Telegraph fann lögreglan myndbandið sem virðist hafa verið tekið síðustu helgi. Ekkert ofbeldi er á myndbandinu en þar kveðja börnin mömmu sína. Lögreglan rannsakar málið en haft er eftir einum lögreglumanninum að málið sé hryllilegt.

Móðir barnanna, Morongoe Molemohi, er þrítugur háskólanemi. Hún var nýflutt frá manninum sínum fyrrverandi en leyfði börnunum að dvelja hjá honum á meðan hún fann sér nýtt húsnæði. Hún hafði heimsótt börnin kvöldið áður.

Yfirheyrslur hófust yfir Petros í gær en þá hafði hann dvalið á spítala í tvo daga vegna lyfjaneyslunnar.