Nýjar konur með þátt á ÍNN

„Við ætlum að vera þrjár. Lára Ómarsdóttir, Kata Bessa og ég," svarar Bergljót Davíðsdóttir blaðamaður aðspurð um þáttinn Mér finnst sem hefur göngu sína á ný á sjónvarpsstöðinni ÍNN í kvöld klukkan átta.

„Við erum með alveg frjálsar hendur og ætlum að tala um allt milli himins og jarðar."

„Við verðum með gesti og tökum aktúel mál sem eru í gangi hverju sinni en ætlum samt að reyna að hafa þetta afslappað og skemmtilegt," segir Bergljót.

„Við verðum með púlsinn á samfélaginu og reynum að fjalla um það sem kemur fólki við og því sem fólk hefur áhuga á að fá að vita um."

Vísir hafði í kjölfarið samband við fyrrum umsjónarmann þáttarins Mér finnst, Ásdísi Olsen, sem segist ekki hafa ráð á því að vinna kauplaust.

„Þetta var ótrúlega skemmtilegt verkefni og gaman að vera á góðum launum við að gera skemmtilegan þátt," segir Ásdís.

„En Ingvi Hrafn hefur ekki lengur ráð á að borga okkur laun og ég var ekki tilbúin til að vinna kauplaust."

Áttu eftir að sakna Mér finnst? „Já, ég á eftir að sakna Mér finnst og í rauninni finnst mér að þátturinn þeirra mætti heita eitthvað annað því þetta var okkar prógram og þetta var þáttur sem setti stjónvarpsstöðina á dagskrá," segir Ásdís að lokum.