Everton orðað við varnarmenn - City enn að elta Lescott

Það þarf ekki að koma stórkostlega mikið á óvart að bresku blöðin séu uppfull af orðrómum um að Everton sé á eftir varnarmönnum eftir niðurlægjandi 1-6 tap félagsins um helgina gegn Arsenal í fyrstu umferð ensku úrvalsdeildarinnar.

Philippe Senderos hjá Arsenal er áfram sterklega orðaður við Everton en félagið hefur þegar lagt fram kauptilboð í leikmanninn. Þá er Steven Taylor hjá Newcastle sagður hafa lagt fram beiðni til stjórnar félagsins um að vera settur á sölulista til þess að auðvelda fyrir um að hann komist til Everton.

Bresku dagblöðin halda þá áfram að birta fréttir af eltingarleik Manchester City á eftir Joleon Lescott þrátt fyrir að knattspyrnustjórinn David Moyes hjá Everton hafi ítrekað enn og aftur um helgina að varnarmaðurinn sé ekki á förum frá félaginu.

Nýjasti orðrómurinn hermir að City hafi boðið 20 milljónir punda auk þess sem að varnarmaðurinn Richard Dunne og kantmaðurinn Martin Petrov fylgja með í kaupunum.